Нема преживеани во пронајдената урнатина на авионот China Eastern кој се урна со 132 лица на југот на Кина, јавија кинеските државни медиуми, додека потрагата по црната кутија продолжува, која треба да ја разјасни причината за несреќата.

Пронајдени се остатоците од авионот, но во него нема преживеани, објави телевизијата CCTV 18 часа по падот.

Во потрагата по преживеаните учествуваа неколку стотици пожарникари и спасувачи. Сега истражителите ја бараат црна кутија.

Делови од Боингот 737-800 беа расфрлани на планинските падини кои беа зафатени од пожарот по првата кинеска несреќа во која учествуваше комерцијален авион во 2010 година. Биле видени и изгорени остатоци од лични документи и паричници, објавија државните медиуми.

Седум години стар Боинг 737 се урна во понеделникот од височина од повеќе од 8.000 метри, соопшти контролата на летање.

Во авионот имало 123 патници и девет членови на екипажот, сите кинески државјани. Ова е најтешката авионска несреќа во Кина во последните 12 години.

Боинг 737 се урна во рурална област во близина на градот Вужоу, во регионот Гуангкси.

Американскиот производител на авиони „Боинг“ објави дека техничките експерти се подготвени да помогнат во истрагата за причините за несреќата, која ја водат кинеските власти за цивилна авијација.