Руслан Стефанчук, претседателот на украинскиот парламент, вели дека секое решение за Украина мора да обезбеди заштита на нејзините граѓани, враќање на нејзиниот територијален интегритет и одвраќање на агресорите. Ова го изјави по средбата со американскиот секретар за копнени сили, Даниел Дрискол, денеска во Киев.

Тој нагласи дека првата посета на функционер од ова ниво на Украина по повеќе од 25 години е важен сигнал во време кога Русија „води брутална и непринципиелна“ војна.

Стефанчук изрази благодарност до американскиот претседател Доналд Трамп за неговата намера да постигне мир.

„Украина ја цени поддршката од Соединетите Американски Држави и со нетрпение очекува понатамошни чекори што ќе ја зајакнат нашата одбрана и ќе ја зголемат заштитата од руска агресија“, заклучи Стефанчук.

Украинскиот претседател Володимир Зеленски вчера потврди дека е подготвен да соработува со администрацијата на американскиот претседател Доналд Трамп на нејзиниот нов план за мир во Украина.

Зеленски во објава на Телеграм изјави дека украинските и американските тимови ќе работат на мировен план од 28 точки за завршување на војната. 

Кремљ соопшти дека Русија сè уште не добила ништо официјално од Соединетите Држави за мировниот план на САД за Украина од 28 точки, но е подготвена да преговара.

Руската инвазија на Украина почна на 24 февруари во 2022 година. 

фото Фејсбук/Верховна Рада України