Американскиот претседател Џозеф Бајден изјави дека републиканците ќе го започнат процесот на негов импичмент доколку го преземат мнозинството во Претставничкиот дом и Сенатот на конгресните избори што ќе се одржат ширум Америка.

Демократскиот шеф на Белата куќа во обраќањето пред приврзаниците на неговата партија во Сан Диего рече дека има информации дека Републиканската партија се подготвува да иницира отповикување доколку го врати мнозинството во двата дома на Конгресот.

- Не знам каква причина ќе дадат за постапката за импичмент. Не се шегувам. Неодамна рекоа дека треба да престанат да зборуваат за импичмент додека не победат на изборите – рече Бајден.

Можноста за покренување на постапката за импичмент против Бајден, за која е потребно просто мнозинство во Претставничкиот дом, и двотретинско мнозинство во Сенатот, ја споменаа американските медиуми, но и самите републикански конгресмени.

- Одредени влијателни републиканци агресивно се движат кон импичмент, барајќи администрацијата на Бајден да биде казнета, но и да им се одмаздат на демократите за двете постапки за импичмент на поранешниот претседател Доналд Трамп – објави Њујорк Тајмс, пренесува „Република.рс“.

А кај републиканските гласачи преовладува расположението да се започне постапка за импичмент против Бајден. Атлантик, повикувајќи се на анкети на Универзитетот во Масачусетс во Амхерст, пишува дека дури 68 отсто од партиските гласачи на Трамп се за импичмент на Бајден. Повеќето републиканци исто така веруваат дека Бајден не бил легално избран за претседател, поради спорот околу резултатите од претседателските избори во 2020 година, бидејќи веруваат дека Трамп ги добил.