Италијанската нафтена компанија Eni и шпанската Repsol SA би можеле да започнат со увоз на нафта од Венецуела во Европа веќе следниот месец.

Тие одлучија да го направат тоа за да го компензираат прекинот на увозот на руска нафта, објави денеска Ројтерс, повикувајќи се на тврдењата на неколкумина извори запознаени со оваа проблематика.

Увозот на нафта од Венецуела беше запрен пред две години кога Вашингтон ги заостри санкциите кон таа земја.

Се очекува дека количината на нафта што ќе ја воведат компаниите „Ени“ и „Репсол“ не е голема, велат упатените, тврдејќи дека влијанието врз светските цени на нафтата ќе биде скромно, пренесува „Ројтерс“.

Стејт департментот напиша писмо со кое ги овласти двете компании да продолжат да увезуваат нафта од Венецуела. Администрацијата на американскиот претседател Џозеф Бајден се надева дека венецуелската нафта може да и помогне на Европа да ја намали зависноста од руската нафта и да пренасочи дел од извозот на Венецуела од Кина.

Зеленото светло на Вашингтон за обновување на одамна замрзнатата нафта од Венецуела во Европа може да даде симболичен поттик за венецуелскиот претседател Николас Мадуро.

Двете споменати европски нафтени компании, кои имаат заеднички вложувања со венецуелската државна нафтена компанија ПДВСА, можат да сметаат на сурова нафта од Венецуела, но клучните услови се венецуелската нафта „мора да оди во Европа“ и да не може да се препродава.

Истовремено, Франција е во преговори со Обединетите Арапски Емирати за да се најде алтернатива за нафтата што доаѓа од Русија, изјави министерот за финансии Бруно Ле Мер.

„Има разговори со Обединетите Арапски Емирати. Мораме да најдеме алтернатива за руската нафта“, изјави Ле Мер за радиото Европа 1, пренесува Ројтерс.