Еден висок руски дипломат истакнал дека повеќе од 800 државјани на Русија се борат во рамки на силите на екстремистичката војска на Исламската држава. Илија Рогачев кој е на чело на Одделението на Министерството за надворешни работи за современи предизвици и закани, рекол за радио „Ехо Москва“ дека на екстремистичката војска и се придружиле борци од Чеченија и други региони во Русија кои се наоѓаат на нестабилниот северен Кавказ. Тој рекол дека тешко е да се утврди бројот на државјани од Русија  кои се дел од силите на Исламската држава бидејќи меѓу нив има и чеченски бегалци кои претходно престојувале во Европа, како и поголем број Чеченци од Грузија. Чеченија која помина низ две разорни сепаратистички војни, донекаде се стабилизира, но исламистичките побуни зафатија и други покраини на Северен Кавказ.