Потпретседателот на САД Џ.Д. Венс денес пристигна во Унгарија со мисија да даде поттик на изборната кампања на актуелниот премиер Виктор Орбан, чија амбиција да биде реизбран се соочува со најголемите тешкотии од почетокот на неговата политичка кариера.

Само неколку дена пред парламентарните избори, закажани за недела, 12 април, Венс треба да се сретне со Орбан и да учествува заедно со унгарскиот лидер на предизборен митинг.

Венс и неговата сопруга Уша беа пречекани на аеродромот во Будимпешта од унгарскиот министер за надворешни работи Петер Сијарто.

Во разговор со новинарите пред да замине на дводневна посета на Унгарија, потпретседателот на САД изрази желба да „го види (својот) добар пријател Виктор“.

- Ќе разговараме за голем број прашања поврзани со односите меѓу САД и Унгарија - додаде Венс, прецизирајќи дека ќе се разговара за односите со Европската Унија и Украина.

АП проценува дека овој редок израз на поддршка, кој лично го дал висок функционер на американската администрација, е најновиот пример што ја илустрира подготвеноста на американскиот претседател Доналд Трамп да ги поддржи националистичките лидери кои ги делат неговите ставови, како што се Хавиер Мили во Аргентина и Санае Такаичи во Јапонија.

Трамп го опиша Орбан како навистина силен и моќен лидер, нудејќи му ја својата поддршка пред изборите.

Според неколку независни анкети на јавното мислење, партијата Фидес на Орбан заостанува зад партијата на Тиша, чиј лидер е Петер Маѓар, член на Европскиот парламент и поранешен сојузник на Орбан кој имал разни влијателни позиции во неговата администрација.

Поддршката што администрацијата на Трамп му ја даде на Орбан, вклучително и посетата на Џ.Д. Венс, можеби не е доволна за да ги поколеба унгарските гласачи, велат политичките аналитичари, забележувајќи дека домашните прашања како што се трошоците за живот беа во срцето на изборната кампања.