Полскиот претседател Анджеј Дуда изјави денеска дека уништувањето на гасоводите Северен ток 1 и 2 е многу корисно за Европа, пренесе Си-Ен-Ен.

Дуда рече дека не знае дали е точно дека украински диверзанти се виновни, како што објави синоќа американски „Њујорк тајмс“, повикувајќи се на наводните наоди на американските разузнавачки служби. Сепак, како што додаде, смета дека уништувањето на гасоводот е секако добра работа за Европа.

„Доколку „Северен тек“ престане да постои и ако тоа значеше дека не може да се користи за транспорт на гас во Европа, тоа би било многу корисно за Европа“, рече тој. Ваквото тврдење лидерот од Полска го објасни со тоа што, според него, Русија го користи гасоводот како „инструмент за доминација во Европа“, и на тој начин Европа се ослободува од тоа несакано влијание.

„Со мир ги чекам резултатите од истрагата. Се надевам дека ќе откриеме кој е одговорен за нападите“, додаде Дуда.

Американскиот совет за национална безбедност денеска негираше дека некој од членовите на службата дал изјави на оваа тема, бидејќи не биле овластени да го прават тоа, и додаде дека, според тоа, властите не можат да го потврдат кредибилитетот на информацијата на „Њујорк тајмс“. 

Американските медиуми со својата неодамнешна објава предизвикаа лавина коментари. Во таа прилика Киев изјави дека Украина нема никаква врска со саботажата на гасоводот, додека Европската унија одби да даде поконкретен коментар. Шефот на европската дипломатија Џузепе Борел денеска изјави дека не се плаши од вистината, туку дека треба да ги почека конечните резултати од истрагата што ја спроведуваат Германија, Данска и Шведска. Германскиот министер за одбрана го поддржа овој став и додаде дека е прерано да се обвинува Украина за нападот.