Интензивната прослава со пет милиони жители излезени да улиците на Буенос Аирес на дочекот на автобусот на новите светски фудбалски шампиони однесе два животи, соопшти аргентинската полиција.

Едно 24-годишно лице го загуби животот откако паднал од стаклениот кров на кој бил качен и починал на лице место. Друг навивач пак починал откако се задушил од знамето што го имал врзано околу вратот, откако преку него поминал мотоцикл и почнал да го влече зад себе.

Петгодишно дете се наоѓа во кома откако на главата му паднал дел од споменик на кој биле качени десетина навивачи, а здравствените власти пријавиле неколку илјади повредени во обидот да се качат на повисоки објекти и да бидат што поблиску до рутата на која поминувал автобусот со Лионел Меси и останатите фудбалски ѕвезди.

Ситуацијата беше на работ да излезе од контрола откако беше блокиран автобусот со фудбалерите, кој триесетина минути стоеше во место, за на крајот играчите и стручниот штаб со хеликоптери да бидат евакурани.

Полицијата морала да интервенира со употреба на водени топови и гумени куршуми.