Прославата за Божиќ според Јулијанскиот календар почна во Витлеем, библискиот град на Западниот брег во кој според христијанските верувања се родил Исус Христос, со собирање на големодостојниците како и стотици локални верници и туристи на плоштадот пред Црквата Христово раѓање. Тие се собираат и покрај студеното време и прогнозите дека регионот на Блискиот исток вечерва ќе биде зафатен од силна снежна бура. Од раните утрински часови палестинските христијани од целиот Западен брег марширале покрај градот, свирејќи со гајди и тапани. Се очекува на вечерашната литургија да присуствува палестинскиот претседател Махмуд Абас и пратеникот на јорданскиот крал Абдулах. Ова е втор божиќ кој се слави во Витлеем, првиот беше според грегоријанскиот (католички) календар на 25 декември, а претстои уште една прослава на  ерменски Божиќ на 19 јануари.