Почина полицаецот кој беше тешко повреден во вчерашниот терористички напад на југот на Франција, соопшти франскиот министер за внатрешни работи Жерар Колон.

Полицискиот офицер Арно Белтрам (45) му се предаде на киднаперот во замена за ослободување на заложниците. 

„Франција никогаш нема да го заборави неговото херојство, неговата храброст, неговата жртва“- напиша Колон на Твитер.

Францускиот претседател Емануел Макрон претходно изјави дека Белтрам спаси животи и служи на чест на армијата и земјата. 

Три лица се убиени вчера во југозападна Франција во серија напади, кога напаѓачот прво одзеде возило во градот Каркасон усмртувајќи едно лице и ранувајќи две лица, а потоа зеде заложници во супермаркет во градот Треб, извикувајќи „Алах Акбар“. 

За нападот одговорноста ја презеде терористичката „Исламска држава“.

Напаѓачот Редван Лакдим, 26-годишен, и беше познат на полицијата за ситни прекршувања на законите.

Киднаперот е неутрализиран од припадници на полицијата кои упаднале во супермаркетот. 

Киднаперот, кој тврдел дека е припадник на џихадистичката група Исламска држава (ИД), вчера претпладне упадна во супермаркетот убивајќи две лица и задржувајќи тројца заложници. Набрзо тој ги ослободи заложниците и заедно со потполковникот на француската жандармерија, кој се јави доброволно да замени еден од заложниците, остана сам во супермаркетот. 

Тој двапати го застрелал Белтрам и му задал повеќе удари со нож, јави АФП, повикувајќи се на свои извори. Потполковникот цело време го држел отворен својот мобилен телефон, што и помогнало на полицијата да ја следи состојбата во супермаркетот.