Лиза Мари Присли, единственото дете на легендата на рокенролот Елвис Присли, почина на 54-годишна возраст, соопшти нејзината мајка.

„Со тешко срце морам да ја споделам катастрофалната вест дека мојата прекрасна ќерка Лиза Мари нè остави“, рече Присила Присли.

Лиза Мари, исто така пејачка, беше итно пренесена во болница претходно во четвртокот. Медиумите велат дека имала срцев удар.

Таа била пронајдена во бесвесна состојба  во нејзиниот дом во Калабасас, Калифорнија.

„Таа беше најстрасната, најсилната и најсакана жена што некогаш сум ја познавала“, рече Присила Присли во изјавата.

„Бараме приватност додека се обидуваме да се справиме со оваа длабока загуба.

Нејзината мајка не даде детали за можната причина за смртта.

Цитирајќи извор близок до Лиза Мари Присли, ТМЗ објави дека ѕвездата била пронајдена без реакција во нејзината спална соба во четвртокот наутро. Речиси во исто време, нејзиниот поранешен сопруг Дени Кеу, кој исто така живее на имотот и изврши CPR.

Набргу потоа пристигнале болничарите, кои ја однеле Присли во болница.

Добитничката на Греми наградата Дајан Ворен ја изрази својата тага поради „ужасната вест“. Пејачката додаде дека „целиот свет испраќа љубов и молитви до децата на Присила и Лиза Мари во моментов“.

Ко-основачот на Beach Boys, Брајан Вилсон, рече: „Тешко е да се прифати кога ќе замине некој толку млад и полн со живот“.

Во објава на Твитер, актерката Марли Метлин, добитничка на Оскар, напиша: „Имав шанса да ја запознаам Сила Присли кога бев на „Танц со ѕвездите“ и како мајка, не можам да ја замислам болката што таа мора да ја преживее“.

Родена во 1968 година, Лиза Мари продолжи да ги следи стапките на нејзиниот татко и започна кариера во музиката. Ѕвездата издаде три албуми, при што нејзиниот деби студиски албум од 2003 година беше продаден во стотици илјади примероци и доби генерално позитивни критики.

Ѕвездата беше добро позната и по серијата бракови од висок профил со поп легендата Мајкл Џексон, актерот Николас Кејџ и музичарите Дени Киу и Мајкл Локвуд.

Имала четири деца, меѓу кои и актерката Рајли Киу. Синот на Присли, Бенџамин Киу, се самоуби во 2020 година.

Присли последен пат беше видена во јавноста во вторникот вечерта на доделувањето на Златните глобуси во Беверли Хилс.

Во придружба на нејзината мајка, двете се расплакаа додека го гледаа Остин Батлер како ја добива наградата за најдобар актер за неговиот портрет на нејзиниот татко.

За време на емотивниот говор, актерот му се заблагодари на семејството Присли за помошта во текот на филмот.

„Ви благодарам момци, ви благодарам што ми ги отворивте срцата, вашите спомени, вашиот дом“, рече Батлер. „Лиза Мари, Присила, те сакам засекогаш“.