Пожар избувнал синоќа во бегалскиот камп во околината на францускиот град Кале, каде живеат неколку илјади илегални имигранти од Азија и Африка.

Никој не е повреден во инцидентот, објавија од полицијата на Па-де-Кале. Пожарот зафатил површина од околу 2.500 квадратни метри. Пожарот е изгаснат, повредени нема, изјавила заменик портпаролот Режи Елбез.

Властите истакнуваат дека овој инцидент на никаков начин не е поврзан со терористичките напади во Париз.

Според првичните податоци причината е краток спој на електричната инсталација. Во овој момент во Па-де-Кале, каде е најкраткиот пат за Велика Британија, живеат околу 6.000 имигранти.

Живеат во кампот „џунгла“, како што е популарно познат, немаат легитимен статус, но владата фактички го дозволува нивното постоење и не спроведува никакви мерки за ликвидацијата на кампот.

Таму постојано се трупаат нови имигранти и напнатоста расте, што ги тера властите да праќаат нови полициски сили за обезбедување на мирот и безбедноста во регионот. Сега редот таму го обезбедуваат повеќе од 1100 полицајци.