Финска ќе ја прекине употребата на вакцината на Модерна против ковид-19 кај мажи родени во 1991 година и подоцна, поради извештаи за ретки кардиоваскуларни несакани ефекти, објави Институтот за здравје и благосостојба.

Шведските и данските здравствени службеници вчера попладне објавија дека ќе ја прекинат употребата на вакцината Модерна за сите млади возрасни и деца. Норвешка веќе користи вакцина Фајзер за сите деца, а сега ја препорачува и за мажи под 30 годишна возраст.

Нордиските земји одлуката ја темелат на необјавена нордиска студија за истражување која содржи податоци од Финска, Шведска, Норвешка и Данска. Шведска соопшти дека ќе ја суспендира вакцината на Модерна за луѓе родени во 1991 година и подоцна, по извештаите за можни ретки несакани ефекти, како што е миокардитис.

Шведскиот институт за јавно здравје рече дека податоците укажуваат на поголема инциденца на миокардитис (воспаление на срцевиот мускул) и перикардитис (воспаление на слузницата на срцето) кај младите луѓе кои биле вакцинирани.

„Врската е особено јасна во случајот со вакцината на Модерна, Спикевакс, особено по втората доза“, се вели во соопштението.

Сепак, се вели дека ризикот од миокардитис и перикардитис е многу мал. Луѓето родени во 1991 година или подоцна, кои ја примиле првата доза на вакцината на Модерна, околу 81.000 од нив, нема да ја добијат втората доза.

Претходно оваа недела, Шведската агенција за јавно здравје објави дека децата на возраст од 12 до 15 години можат да примат само вакцина Фајзер. Европската агенција за лекови ја одобри вакцината на Фајзер во мај, а на Модерна за деца над 12 години во јули.