Најмалку пет лица загинаа за време на судирите меѓу приврзаниците на ирачкиот шиитски верски водач Моктада ал-Садр и безбедносните сили во Багдад, а во целата земја беше воведен полициски час.

Немирите се случија откако Ал Садр објави дека се повлекува од политиката и ги затвора своите канцеларии како одговор на нерешливата политичка ситуација.

Стотици приврзаници на Ал Садр упаднаа во Палатата на Републиката, што доведе до судири со безбедносните сили, при што беа убиени најмалку пет демонстранти.

Демонстрантите со јажиња ги отстранија бариерите пред владината палата и ги пробија портите. Многумина насилно упаднаа во луксузните сали од мермер, каде што се собираат ирачките лидери и странските гости, пренесува агенцијата АП.

Во престрелката беа ранети најмалку 15 учесници на протестот, а 12 беа повредени кога врз нив беше фрлен солзавец или во физички пресметки со полицијата.

Ирачката здружена оперативна команда воведе полициски час низ целата земја, кој ќе започна во 19 часот по локално време и се уште не е познато кога ќе заврши, јавува Ројтерс.

Нерешливата политичка ситуација по изборите

Политичката сцена во Ирак е поделена на два блока од изборите во октомври минатата година, а обидите на премиерот Мустафа Ал Кадими да посредува меѓу „садристите“ и шиитските групи собрани во коалицијата Рамка за координација беа неуспешни.

„Садристите“ и нивните сунитски и курдски сојузници се обидоа да формираат мнозинска влада по изборите, но Координативната рамка го спречи и изборот на нов претседател кој требаше да го именува премиерот.

Во јуни Садр, незадоволен од преговорите за формирање нова влада, ги повлече 73-те заменици. Неговите поддржувачи упаднаа во парламентот на крајот на јули и оттогаш одржуваат протести пред зградата на парламентот, барајќи предвремени избори.

Поддржувачите на Ал Садр поставија шатори и протестираа пред Врховниот судски совет во вторникот, обвинувајќи го телото дека е пристрасно во корист на нивните политички ривали.