Италијанските медиуми јавуваат дека состојбата на папата Франциско и понатаму е критична, а „Кориере дела сера“ под знак прашање наведува дека тој има сепса и дека му откажале бубрезите.

Ватикан соопшти дека папата се уште ја прима терапијата, дека е расположен и нормално се храни. Велат и дека „Папата ништо не го боли“. Верниците собрани во Ватикан, но и ширум светот, секоја вечер се молат за Светиот Отец.

Со оглед на тоа дека папата е во болница со пневмонија на двете белодробни крила и е во критична состојба, светот е во состојба на висока готовност за можен вонреден медиумски настан – смрт на римокатоличкиот поглавар.

Прописите и процедурите на Ватикан за пренос на должностите се јасни и детални во случај на смрт или оставка на папата, но тие не се применуваат кога тој е болен, па дури и во кома.

Исто така, нема конкретни норми кои диктираат што се случува со раководството на Римокатоличката црква кога нејзиниот поглавар не е во состојба да ја извршува својата функција, пишува агенцијата АП.

Затоа, папата Франциско, иако хоспитализиран и во критична состојба со сложена пневмонија, сепак ги има сите овластувања, наведува американската агенција.

Неговата хоспитализација, сепак, покренува прашања за тоа што би се случило ако остане во кома подолг период, или ако го следи примерот на Бенедикт Шеснаесетти, кој се повлече од функцијата доколку не беше во можност да ги извршува своите должности, пишува АП.

Папата Франциско ја презеде функцијата на 13 март 2013 година и секојдневно раководи со Ватикан и тим функционери, без разлика дали е во Апостолската палата или не.

Главен меѓу овие функционери е државниот секретар на Ватикан, кардиналот Пјетро Паролин, кој беше во Буркина Фасо на денот на хоспитализацијата на папата на 14 февруари, за потоа да се врати во Ватикан. Сите други функции на Ватикан се одвиваат нормално, вклучително и прославата на Светата, или јубилејот, 2025 година на Римокатоличката црква.

Иако папата Франциско е и бискуп на Рим, нема правила што точно ќе се случи доколку биде спречен да ги извршува своите должности.

Тим адвокати кои се занимаваат со канонските правила на Римокатоличката црква предложија норми во 2021 година кои ќе ја регулираат ситуацијата кога папата не е во можност да ја извршува својата улога, привремено или трајно.

Според нивниот предлог, со црквата би управувала конклава или Колеџ на кардинали, а во случај на привремена неспособност на папата би управувала специјална комисија, додека на секои шест месеци ќе се проверува здравјето на поглаварот на Римокатоличката црква.

Како што пренесува АП, единствениот случај кога има промена на личноста на чело на Црквата е смрт или оставка на папата.

Тогаш се активираат цела низа прописи кои го одредуваат „меѓувластот“, односно преодниот период помеѓу крајот на понтификатот на еден поглавар и изборот на нов папа. Во овој период, администрацијата и финансиите на црквата се управувани од кардиналот „камерленго“, или комера на Светиот колеџ на кардиналите.

Тој ја потврдува смртта на папата и го подготвува неговиот погреб пред да се состане конклавата на која се избира новиот папа.

Таа позиција моментално ја држи кардиналот Кевин Фарел. Овој функционер, сепак, нема никаква улога ако папата е болен или не може да ги извршува своите должности од која било друга причина. Исто така, деканот на Колеџот за кардинали, кој би ја организирал конклавата за избор на нов папа, нема никаква улога во случајот на болеста на папата.

Таа позиција моментално ја држи италијанскиот кардинал Џовани Батиста Ре, според АП. Папата Франциско на почетокот на овој месец одлучи да го задржи Ре на таа позиција, иако неговиот мандат е истечен.

фото: EPA-EFE/MASSIMO PERCOSSI