Северната железничка станица и блиската зграда на обвинителството во Брисел попладнево се евакуирани заради дојава за бомби. 

Испратено е и предупредување за бомба на железничката станица Брисел-Миди, пишуваат белгиските медиуми.

Зградите на Северната железничка станица и на обвинителството се евакуирани по анонимниот повик во кој беше посочено дека во нив има поставено бомба. 

На двете локации има голем број полицајци и војници. 

Весникот „Дерниер ер“ наведува дека во зградата на обвинителството е спроведена истрага, но дека бомба не е најдена.

На Северната железничка станица сообраќајот е во прекин и тоа на барање на полицијата. Во меѓувреме 20-тина агенти влегоа во станицата за да ја почнат истрагата.

„Дерниер ер“ пишува  дека дојава за бомба пристигнала за уште една бриселска железничка станица - Брисел-Миди.

Властите се внимателни по нападите кои годинава се случија во Брисел.