Санкциите за руската нафта значително влијаат на финансирањето на војната на рускиот претседател Владимир Путин. 

Украинскиот претседател Володимир Зеленски вчера ги поздрави новите американски санкции против рускиот нафтен сектор и неговата таканаречена флота на танкери во сенка.

„Овие мерки нанесуваат значителен удар врз финансиските основи на руската воена машина со нарушување на целиот синџир на снабдување“, рече Зеленски на платформата X.

Администрацијата на Џо Бајден го воведе најширокиот пакет санкции чија цел се приходите на Русија од нафта и гас, во обид да им даде предност на Киев и на идната администрација на Доналд Трамп во преговорите за постигнување мир во Украина.

Американското министерство за финансии воведе санкции против руските компании „Газпром“ и „Сургутнефтегас“ кои ископуваат, произведуваат и продаваат нафта и против 183 бродови со кои се превезува руската нафта. Многу од овие танкери биле користени за транспорт на нафтата во Кина и Индија.