Уште еден пациент со ХИВ е излечен по ризична трансплантација на матични клетки, објавија истражувачите. 

Пациентот од Дизелдорф (53) е петтиот излечен пациент преку експериментален третман со матични клетки кои се отпорни на ХИВ. Неименуваниот маж не земал антиретровирусни лекови четири години - апчиња кои обично се потребни секојдневно за да се одржи вирусот под контрола, велат лекарите, пренесува „ABCnews“.

Неговиот случај следи по оној на „пациентот од Берлин“ и „пациентот од Лондон“ кои беа во долготрајна ремисија откако ја поминаа истата процедура. На примателите им биле дадени матични клетки кои стекнале отпорност на вирусот ХИВ преку мутација која го брише протеинот што вирусот вообичаено го користи за да влезе во клетките.

Речиси една деценија по трансплантација на матични клетки од донатор и повеќе од четири години по завршувањето на терапијата пациент од Дизелдорф сега е во добра здравствена состојба, пишуваат медиумите.

„Тоа е навистина лек, а не само долготрајна ремисија“, вели д-р Бјерн-Ерик Оле Јенсен, кој го лекувал пациентот и го пријавил новиот случај во Nature Medicine. „Овој случај влева надеж, но има уште многу работа да се направи.

Со години, антиретровирусна терапија (АРТ) се дава на луѓе со ХИВ со цел да се намали вирусот на речиси невидливи нивоа и да се спречи неговото пренесување на други луѓе. Но, имунолошкиот систем го држи вирусот затворен во резервоари во телото, и ако поединецот престане да зема АРТ, вирусот може да почне да се размножува и да се шири. Вистински лек би го елиминирал овој резервоар, а тоа изгледа му се случило на последниот пациент, пишува Nature.

Третманот со матични клетки првпат беше користен за лекување на Тимоти Реј Браун, кој е познат како берлински пациент - тој беше првиот човек што беше излечен од ХИВ. Во 2007 година, Браун имаше трансплантација на коскена срцевина, во која неговите клетки беа уништени и заменети со матични клетки од здрав донор, за лекување на акутна миелоидна леукемија. Тимот што го третира Браун избра донатор со генетска мутација наречена CCR5D32/D32, која спречува протеинот на површината на клетката CCR5 да се изрази на површината на клетката. ХИВ го користи тој протеин за да влезе во имуните клетки, така што мутацијата ги прави клетките ефективно отпорни на вирусот. По постапката, Браун можеше да престане да зема АРТ и беше без ХИВ до неговата смрт во 2020 година.

Повеќе од 40 милиони луѓе умреле од СИДА од почетокот на епидемијата во раните 1980-ти, а првиот човек кој официјално бил излечен од ХИВ во светот бил Тимоти Реј Браун, кого истражувачите го нарекле „Берлински пациент“.

Фото:  EPA/WU HONG