Откако се појави мутација на коронавирусот во Британија, Кинезите го сметаат Лондон за нов „Вухан“. 

Кина е повторно во состојба на готовност по извештајот за новиот вид на вирусот корона откриен во Лондон. Вухан ја повика кинеската Управа за цивилно воздухопловство да забрани летови на патници од Велика Британија, а се разгледува и прекинувањето на летовите на товарни авиони од оваа земја откако во септември повторно беше воспоставена рутата, објави порталот Asiatimes.com. Некои кинески официјални лица и научници тврдат дека вирусотможеби не потекнува од Кина, а кинескиот државен весник „Јангце Дејли“ (Yangtze daily) пишува дека развојот на настаните во Велика Британија може да биде „нов доказ дека вирусот има повеќе верзии и повеќекратно потекло“.

Корисниците на Интернет во Вухан го нарекуваат Лондон „новиот Вухан“ и се прашуваат дали новоназначената британска амбасадорка во Кина, Каролин Вилсон, можеби донела нов вид на коронавирус во нивниот град. Веќе поминаа четири дена  како е видена без заштитна маска на неколку официјални настани. Вилсон пристигна во Кина од Велика Британија на крајот на октомври и помина 14 дена во карантин во амбасадата во Пекинг, а според некои медиуми, новиот вид на вирус прво е откриен во септември на југоистокот на Велика Британија. Во градот Вухан, кој беше блокиран од февруари до април, немало случаи на локално пренесување на вирусот ковид-19 од мај, според кинеската Национална комисија за здравство.