Украинскиот претседател Володимир Зеленски ги постави условите за преговори со Русија, повикувајќи ја Москва да се придржува до Повелбата на Обединетите нации (ОН) и да плати компензација за загубите предизвикани од тековната војна, јави денеска Анадолија.

- Уште еднаш: повторно воспоставување на територијалниот интегритет, почитување на Повелбата на Обединетите нации, компензација за сите воени штети, казнување на секој воен злосторник и гаранции дека тоа нема да се повтори. Тоа се апсолутно јасни услови – рече Зеленски во својот говор на каналот Телеграм.

Зеленски, говорејќи преку видео врска на 27-та конференција на Обединетите нации за климатски промени, го повтори повикот за обновување на територијалниот интегритет на Украина, казнување на секој воен злосторник и обезбедување гаранции дека тоа нема да се повтори.

Претходно овој месец, претседателот на Украина рече дека неговата земја е подготвена да влезе во преговори со Русија само доколку руските трупи ги напуштат сите делови на Украина, вклучително и Крим и источниот дел на Донбас, кои Русија де факто ги контролира од 2014 година.