По 16 години власт, Виктор Орбан го призна изборниот пораз, откако неговиот главен противкандидат Петер Маѓар освои убедливо мнозинство на парламентарните избори во Унгарија. Според речиси конечните резултати, коалицијата на Маѓар обезбедила 138 од вкупно 199 пратенички места, додека Фидес паѓа на околу 55 мандати и заминува во опозиција.

– Унгарците денеска рекоа „да“ за Европа и слободна Унгарија – изјави Маѓар, повикувајќи ги функционерите блиски до Орбан да поднесат оставки.

Во Европска комисија резултатот беше дочекан со олеснување. Претседателката Урсула фон дер Лајен порача дека „Унгарија се враќа на европскиот пат“, што значи дека повеќе нема да се блокираат клучни одлуки, вклучително и помошта за Украина.

Големи последици се очекуваат и на меѓународен план. Украинскиот претседател Володимир Зеленски ја поздрави победата и најави подготвеност за продлабочување на соработката.

Од друга страна, поразот на Орбан се смета за удар и за администрацијата на Доналд Трамп и потпретседателот Џеј Ди Венс, кои јавно го поддржуваа унгарскиот лидер. Аналитичарите оценуваат дека и Русија губи важен сојузник во рамките на Европската унија.

На домашен план, најголемиот удар се очекува врз бизнис-елитата блиска до Фидес, меѓу кои и олигарсите како Лоринц Месарош и Иштван Тиборц, кои би можеле да го изгубат привилегираниот пристап до државни договори и европски фондови.

Маѓар најави формирање на специјален „уред за обновување на националното богатство“, кој ќе има задача да ги истражи спорните зделки и да врати државни средства.

– Ќе има одговорност за сите кои учествувале во корупција – порача тој.

Покрај политичките структури, на удар ќе се најдат и конзервативните тинк-тенкови финансирани од претходната власт, како и мрежата на институции што лобираа во Брисел.

Со оваа победа, Унгарија влегува во нова политичка ера, со најави за пресметка со корупцијата и враќање кон европските вредности.