Европската комисија денес предложи уредба за воспоставување дигитален сертификат што треба да овозможи безбедно патување во рамките на Европската унија за време на пандемија. Ова ќе биде доказ дека лицето е вакцинирано, веќе се опоравило од болеста или има негативен тест за ковид-19.

Сертификатите ќе бидат бесплатни, во дигитална или хартиена форма на јазикот на земјата издавач и на англиски јазик. Ќе содржат код за да се осигури безбедноста и автентичноста на сертификатот.

Овие сертификати треба да бидат усогласени и проверливи низ целата Европска унија.

Сертификатите ќе содржат ограничен сет на податоци како што се име, датум на раѓање, датум на издавање, релевантни информации за вакцина / тест / закрепнување и единствен идентификатор на сертификат.

Комисијата ги повикува земјите-членки и Европскиот парламент да го усвојат предлогот што е можно поскоро за регулативата да стапи на сила до летото.

Потпретседателот на Комисијата, Маргаритис Шинас, во интервју за ФАЗ изјави дека потврдата треба да биде готова „до лето, а летото започнува на 1 јуни“.

Тоа е мерка која во голема мерка има за цел да го спаси туризмот во ЕУ.

Земјите-членки ќе бидат обврзани да го применат.

Комисијата се определи за уредба, затоа што земјите-членки се должни директно да ја применуваат, спротивно на препораките, што и онака ги следат малку земји.

Бидејќи нема доволно вакцини, Комисијата сака овие сертификати да содржат резултат на тестирање на ковид-19 или присуство на антитела, така што луѓето кои немале можност да се вакцинираат не бидат дискриминирани, како што се спротивставија многу земји.

Според Комисијата, досега се вакцинирани само 3,5 проценти од населението во ЕУ.

Извор и фото: Индекс.хр