Британците сега би гласале за останување на нивната земја во ЕУ, покажува  анкетата објавена денеска на институтот Би Ем Џи, цитирана од Ројтерс.

На референдумот на 23 јуни 51,9% од Британците гласаа за напуштање на ЕУ, а 48,1%- за останување.

На прашањето во анкетата на Би Ем Џи дали Велика Британија да ја напушти ЕУ или да остане во неа, 45%  од испитаниците сакаат останување, 43%  напуштање, а 12% немаат став.

Анкетата е спроведена од 19 до 24 октомври меѓу 1546 полнолетни Британци. 

Политичките лидери во Шкотска и Северна Ирска, каде повеќето луѓе поддржаа останувањето во ЕУ, велат дека најавената одлука на Врховниот суд на Лондон ја покажува конфузијата која владее околу пристапот на премиерката,  Тереза ​​Меј кон Брегзит. 

Врховниот суд пресуди дека владата не може да ја активира постапката за напуштање на ЕУ без одобрение на парламентот.