Поранешниот работник, на возраст од околу 30 години, работел како магационер во компанијата девет месеци и заработувал 14 евра на час.

Во неодамнешното интервју за медиумите, шефот на една позната компанија во Германија, Хорст Котмајер, ја изрази својата загриженост за сè пораспространетиот тренд меѓу работниците во Германија.

Котмајер открил дека еден од неговите вработени, сега поранешен вработен во компанијата, одлучил дека му е попрофитабилно да добива граѓански доход (Бургергелд) и да работи „на црно“ отколку да остане вработен во компанијата. Оваа изјава поттикна дискусија за можен растечки феномен во германското општество, пренесува магазинот Феникс.

Поранешниот работник, на возраст од околу 30 години, работел како магационер во компанијата девет месеци и заработувал 14 евра на час. Котмајер истакна дека ова е почетната плата во неговата компанија. Од друга страна, на корисниците на Бургергелд им се плаќа 502 евра месечно, со дополнителна поддршка за трошоците за кирија и греење. Котмајер, кој е трета генерација на чело на компанијата и вработува 350 луѓе, изразува загриженост дека овој пристап може да привлече други работници.

„Сè уште нема конкретни знаци дека и други работници би можеле да се приклучат на овој тренд, но постои реална опасност од тоа. Луѓето мислат дека не им вреди да работат ако тие што добиваат помош, освен што работат на црно, имаат и повеќе приходи од вработените“, вели Котмајер.

Исто така, треба да се напомене дека следната година стапката на Бургергелд ќе се зголеми на 563 евра месечно, што дополнително ја поттикнува дебатата за тоа дали Германија ќе стане општество каде што некои „одмараат, а други плаќаат за тоа работејќи“. Овој феномен, доколку се прошири, може да има длабоко влијание врз германскиот пазар на труд и социјалната политика.