Илјадници Британци и синоќа продолжија да и оддаваат почит на кралицата Елизабета Втора, чиј ковчег е изложен во Вестминстерската сала во Лондон, а многумина чекаат во редици со часови низ центарот на Лондон.

Некои од нив спиеле на тротоарите, издржувајќи го дождот, за да си го обезбедат местото во линијата која се протегала од Вестминстерската сала до 15 километри, пренесуваат агенциите. Владините претставници не можеа да прецизираат колку луѓе чекаат на ред, но се верува дека до 16 часот имало 750.000.

„Таа ни даде 70 години од својот живот“

Архиепископот од Јорк Стивен Котрел, обраќајќи им се на оние кои чекаат, рече дека тие слават две големи британски традиции - „љубовта кон кралицата и љубовта кон чиновите“. Меѓу насобраните има и такви кои пристигнаа во име на нивните постари родители, оние кои сакаат да бидат дел од историјата и оние кои сакаат да и се заблагодарат на жената која е на власт од 1952 година и извршуваше службена должност дури два дена пред да почине.

– Ни даде 70 години од својот живот – изјави Жаки Д’Арси, 63-годишен жител на Есекс, кој од синоќа чека на ред.

- Важно е да и оддадам почит на починатата кралица. И моите родители го сакаат кралското семејство и не можат да бидат таму. Значи, тоа е дупло, дојдов за мајка ми и татко ми, но и за себе - изјави Д'Арси.

„Таа беше втора мајка на сите“

Марк Бонсер (59) од Донкастер рече дека кралицата е втора мајка на сите.

- Ни даде 70 години од својот живот. Сигурен сум дека можам да издржам 24 часа од мојот живот за да и оддадам почит – рече тој.

Британски „Експрес“ пишува дека луѓето во солзи и оддадоа почит на кралицата откако со денови чекаа во ред за да го видат нејзиниот ковчег. Се верува дека некои Британци го зазеле своето место во редот дури и пред ковчегот да замине за Единбург викендот.

Редиците се протегаа со милји низ Лондон, а повеќе од три четвртини од милион луѓе се очекува да поминат покрај ковчегот на кралицата во деновите пред погребот. Емоциите ги преплавија луѓето, што беше видливо само неколку секунди по отворањето на капијата, наведува „Експрес“.

Церемонијата во Лондон ќе трае вкупно пет дена, а завршува на денот на погребот на кралицата во понеделник. Стотици илјади луѓе кои се приклучија на редот чекаат покрај јужниот брег на Темза, веднаш до знаменитостите на Лондон.

На оние кои ќе се најдат во ред им се дава нараквица во боја со број што им овозможува да ја напуштат линијата за да одат во тоалет или да добијат храна и пијалок.

Има и илјада доброволци и полицајци, а подготвена е и лекарска помош за оние кои ќе треба предолго да чекаат.