Германската влада има намера да го укине бесплатното тестирање со „Ковид-19“ од есен.

Според нацрт -уредбата, за која денеска ќе се расправа на седницата со провинциите, се планира бесплатното тестирање да се укине од октомври.

Со оваа мерка, германската влада сака дополнително да ги мотивира луѓето кои досега не биле вакцинирани, да примат вакцина против вирусот корона, бидејќи оние кои не се вакцинирани мора да бидат тестирани за да ги користат услугите на ресторани, базени, хотели и слично.

Владата смета дека, бидејќи има доволен број вакцини, граѓаните сами избираат дали сакаат да се вакцинираат или не, и со тоа преземаат одговорност за својата одлука, а даночните обврзници не треба да плаќаат за нивното одбивање да се вакцинираат.

Сопствениците на лаборатории и фармацевти го критикуваа планираното укинување на бесплатните тестови.

Претседателот на Комората на фармацевти на Германија, Томас Бенкерт, рече дека бесплатните тестови мора да продолжат да бидат достапни за граѓаните кои не се вакцинирани од лични причини.

Здружението на лаборатории изрази сомневање дека укинувањето на бесплатното тестирање ќе ги натера луѓето да се вакцинираат.

„Ќе се случи спротивното, а тоа е дека и тие ќе избегнуваат тестирање“, посочи претседателот на Здружението, Андреас Бобровски.

Сепак, претседателот на Светската медицинска асоцијација, Франк Улрих Монтгомери, ги разбира намерите на владата.

„Зошто општеството треба да плаќа за тестови на луѓе кои не сакаат да се вакцинираат“, праша тој.