Американскиот претседател Доналд Трамп му постави нов, пократок рок на рускиот колега Владимир Путин да прифати прекин на огнот со Украина, изразувајќи ја својата фрустрираност од продолжувањето на војната.

„Новиот краен рок за Путин е 10 до 12 дена. Разочаран сум од претседателот Путин. Ќе ги намалам првичните 50 дена што му ги дадов на помала бројка зашто мислам дека веќе го знам одговорот што ќе се случи“, кажа Трамп на средбата со британскиот премиер Кир Стармер во Шкотска.

Тој додаде дека многупати зборувал со Путин и добро се сложува со него, но не му се допаѓа што ракетира украински градови и убива луѓе. Тој ја отфрли можноста за средба со Путин.

„Доста ми е од зборување“, рече тој.

Трамп, кој во кампањата повторуваше дека може да ја реши војната за еден ден, кажа дека во пет наврати бил блиску до постигнување договор со Путин, но конечен договор засега не е на повидок.

Во почетокот на овој месец, Трамп ја промени реториката и му постави ултиматум на Путин да прифати прекин на огнот во рок од 50 дена или ќе се соочи со многу сериозни економски санкции.

Поранешниот врховен командант на вооружените сили на Украина и украински амбасадор во Велика Британија, Валериј Залужни, вели дека војната на Русија против Украина може да трае до 2034 година. 

foto EPA/TOLGA AKMEN / POOL