По состанокот во Анталија, на посебна прес-конференција се обрати и украинскиот министер за надворешни работи, Дмитриј Кулеба.

„Би сакал да му се заблагодарам на министерот Чавушоглу што ја организираше оваа средба, тој на некој начин е посредник меѓу украинската и руската страна. Овој разговор беше едноставен од една страна, а тежок од друга страна“, изјави Кулеба.

„Направив се од себе барем да се најде решение за хуманитарната катастрофа што се случува на терен. Најтрагичната ситуација во моментов е во Мариупол. Градот моментално се гранатира, а јас пристигнав овде со хуманитарна цел. Сакавме да организираме хуманитарен коридор од Мариупол за цивилите кои сакаат да побегнат од таа област, областа на страв и борба. Сакавме да организираме и хуманитарен коридор во Мариупол со цел да донесеме хуманитарна помош во градот. За жал, министерот Лавров не беше во позиција да се заложи и да даде некакви ветувања, но за ова прашање ќе стапи во контакт со надлежните органи. Го покренавме и прашањето за примирје, 24-часовно примирје за да се решат најитните хуманитарни прашања. Не постигнавме напредок по тоа прашање бидејќи се чини дека има други во Русија кои одлучуваат за тоа. „Подготвен сум да ги продолжам преговорите, со цел да се запре војната и страдањето на украинските цивили“, рече тој.

Тој исто така рече дека се чини дека Русија ќе продолжи со офанзивата и ќе бара предавање на Киев, што нема да го добие.

Кулеба нагласи дека Украина е подготвена за дипломатија, но подготвена е и да се брани.

„Не можеме да ја запреме војната ако земјата што ја започна агресијата нема желба да го стори тоа“, рече Кулеба, додавајќи: „Украина нема да се предаде“.