Водечки научници повикаа на претпазливост поради стравувањата од нова пандемија откако Светската здравствена организација побара од Кина повеќе информации за порастот на респираторните заболувања и пневмонијата кај децата.

„Мораме да бидеме внимателни. Навистина ни требаат повеќе информации, особено дијагностички информации“, рече Марион Купманс, холандски виролог кој ја советуваше СЗО за Ковид.

Загриженоста најпрво беше предизвикана од предупредувањето издадено во вторник од службата за мониторинг ProMED, дел од Меѓународното друштво за заразни болести. Тие побараа повеќе информации за недијагностицирана пневмонија во Кина.

Се чини дека стандардната формулација на предупредувањето е иста како и првото известување за она што подоцна стана „Ковид“, испратено на 30 декември 2019 година: „Недијагностицирана пневмонија - Кина“.

Научниците велат дека сличноста на овие две предупредувања предизвикува, сè уште неоснована, загриженост дека зголемувањето на бројот на пациенти може да биде предизвикано од друг нов патоген кој може да предизвика пандемија. Според досегашните информации, тие велат дека е поверојатно зголемување на други вообичаени респираторни инфекции како што е грипот, како што е забележано во многу делови од светот по укинувањето на мерките против Ковид. Тоа може да биде и сигнал за повторно појавување на самиот ковид.

СЗО секогаш бара информации од земјите кога се пријавени недијагностицирани или непознати болести, што се случува доста редовно. Сепак, не секогаш издава соопштение за печатот за тоа како во средата.

Брајан МекКлоски, експерт за јавно здравје, кој исто така ја советуваше СЗО за пандемијата, вели дека функционира системот на меѓународни здравствени регулативи на СЗО, повикувајќи се на правилата со кои се регулира како земјите соработуваат со СЗО за потенцијални епидемии.

„Нема да го притиснам копчето за паника за пандемијата врз основа на она што го знаеме досега, но многу сум заинтересиран да го видам одговорот на Кина и да ја видам проценката на СЗО после тоа“, рече тој.

И СЗО и Кина се соочија со прашања за транспарентноста во раните денови на Ковид. СЗО, исто така, ја критикуваше Кина во тоа време за задржување податоци за инфекции и смртни случаи кога ја заврши својата политика на нулта толеранција за Ковид, како и за потеклото на пандемијата.

Според прописите, Кина има 24 часа да одговори на СЗО.

Некои велат дека не е јасно дали пријавените болести се всушност недијагностицирани. Информациите што го поттикнаа предупредувањето за ProMED дојде од тајванската FTV News во вторникот. Во самата Кина неодамна имаше многу извештаи за порастот на респираторните заболувања, вклучително и кај децата. Тамошните власти ова го припишуваат на укинувањето на мерките за Ковид-19 и на циркулацијата на вируси слични на грип, како и на микоплазма пневмонија, честа бактериска инфекција која обично ги погодува помалите деца.

„Можно е да се шпекулира дека тоа би можело да биде она што го видовме во другите делови на светот кога ќе се укинат ограничувањата“, рече Купманс, повторувајќи ги ставовите на сите научници со кои контактираше Ројтерс.

Вирологот Том Пикок од Империал колеџ во Лондон, кој внимателно ја следеше појавата на нови варијанти на коронавирус, рече дека постојат добри алатки за прилично брзо откривање на нови видови на грип или коронавирус, така што се чини малку веројатно дека тоа ќе се случи неоткриено.

„Се сомневам дека може да е нешто старо или комбинација од ковид и групи, но се надевам дека наскоро ќе дознаеме повеќе“, рече тој.