Поради сушата во Италија се очекува зголемување на цените на оризот, маслиновото масло и доматната паста и до 50 отсто. Втор топлотен бран веќе ќе ги зафати Шпанија и Франција, а Кина известува дека од жештините се стопи покривот, а по патиштата пука бетон.

Областите во северна Италија продолжуваат да се борат со најтешката суша во последните 70 години. Како резултат на тоа, овогодинешните жетви на маслиново масло, арборио ориз и пулпа од домати се закануваат да бидат исклучително слаби. Цените би можеле да пораснат и до 50 отсто, што би ги принудило увозниците да бараат нови добавувачи.

Според некои проценки, производството на маслиново масло би можело да биде меѓу 20 и 30 отсто помало (до 15 отсто помалку во Шпанија), при што цените на италијанското маслиново масло се зголемиле за 28 отсто во последните две години. Покрај сушата, тоа е последица и на војната во Украина, бидејќи е прекината испораката на сончогледово масло, а во регионот на Југоисточна Азија имаат проблеми со производството на палминото масло.

Цените на италијанскиот ориз и доматната паста веќе се двојно зголемени во последните две години, пишува Гардијан. 

- Фармерите предупредуваат дека нема снег на Алпите, каде што обично има снег, реките пресушуваат, езерата пресушуваат. Земјоделците садат земјоделски култури, но се плашат дека сушата ќе пропадне - вели Џејсон Бул, извршен директор на Eurostar Commodities, пренесува „Курир.рс“.

Во Лисабон и Сантарем живата би можела да се искачи до 45 степени Целзиусови, а топлината нема да попушти цела недела. Во Франција би требало да биде добри десет степени пониско. Издадено е предупредување за топлотен бран за регионите Тулуз и Бордо.

Од Боро веќе пристигнуваат информации за големи шумски пожари со кои се борат 120 пожарникари. Шумските пожари во областите Ландирас и Тест де Буш веќе зафатија 450 хектари земја, а некои жители мораа да бидат евакуирани.

Европа се подготвува за нов топлотен бран, каде температурите на места ќе надминат 40 степени Целзиусови. Но, лошо е и во Кина, поради што некои се засолнуваат во подземни бункери.

Во 84 градови низ државата за денеска е прогласен црвен аларм, бидејќи температурите може да се искачат над 40 Целзиусови степени; во Шангај, на пример, од 1873 година кога почнале да водат евиденција за мерењата на температурата, досега броеле само 15 дена со толку висока температура.

Од градот Чонгкинг, каде исто така е прогласен црвен аларм, дури има информации дека се стопил и покривот на музејот. Низ градот се распоредени камиони за да го ладат асфалтот со вода, бидејќи тој на некои делови пукнал поради жештините.

Фото: EPA/ Fabio Muzzi