Рускиот претседател Владимир Путин нареди делумна мобилизација на резервистите бидејќи неговата земја се соочува со неуспеси во инвазијата на Украина. Овој потег, објавен во обраќањето до нацијата минатата недела, ја означува првата воена мобилизација на Русија по Втората светска војна и може да биде почеток на вистински кошмар за Кремљ.

Делумна мобилизација е термин кој се користи кога одредени групи луѓе се повикани да служат во вооружените сили. Ова е различно од општата мобилизација, која вклучува регрутирање од општата популација, пренасочување на целата економија и суштински ставање на целата земја во војна.

Колку руски резервисти ќе повика Путин?

Рускиот министер за одбрана Сергеј Шојгу во средата изјави дека Русија ќе повика на воена служба околу 300.000 резервисти. Русите наводно веќе почнале да добиваат известувања со кои се повикуваат да се пријават на должност.

Шојгу рече дека „мобилизациските ресурси на земјата изнесуваат 25 милиони луѓе, а нешто повеќе од 1 процент од оваа бројка спаѓа во делумна мобилизација“.

Ако е точно, ова е значително зголемување. Се верува дека Русија ја нападна Украина со околу 150.000 војници на крајот на февруари, така што дополнителни 300.000 е двојно повеќе. Иако не е јасно како точно ќе бидат распоредени резервистите, потегот на Путин следи по извештаите за големи жртви во Украина. Тоа е прва воена мобилизација во историјата на модерна Русија.

Надворешните проценки за бројот на резервисти со кои располагаат руските воени лидери варираат. Институтот за проучување на војната, тинк-тенк со седиште во САД, кој внимателно ја следи војната во Украина, претходно соопшти дека Русија има повеќе од два милиони резервисти, вклучувајќи поранешни регрути и војници со договор. Сепак, малкумина се активно обучени или подготвени за војна. Само околу 10 отсто од нив добиваат постојана обука по завршувањето на основната воена служба.

Но, има бројни извештаи за неправилности и фактот дека покани за регрутирање добиваат и оние без искуство, болните, старите и оние кои се грижат за деца и стари лица.

Колку е значајна делумната мобилизација на Путин?

Роб Ли, висок соработник во Програмата за надворешна политика на Евроазискиот институт, ја окарактеризира објавата како „една од најзначајните/најризичните политички одлуки што Путин некогаш ги донел“.

На краток рок, напиша Ли на Твитер, делумна мобилизација на резервистите и нови мерки за насилно продолжување на договорите на доброволците кои моментално служат во Украина „би може да биде доволно за да се спречи колапсот на руските сили“.

- Но, Русија сега сè повеќе ќе води војна со луѓе кои не сакаат да бидат таму - додаде Ли, мислејќи на недостатокот на морал и кохезија на единиците меѓу руските сили.

Резервите се суштински компоненти на воените напори на многу земји. На пример, речиси половина од припадниците на американската војска распоредени во Авганистан и Ирак во текот на изминатите 20 години наводно потекнуваат од Националната гарда и резервите, а тие групи презеле околу 18 отсто од жртвите.

Руските резервисти не се ни приближно добро организирани како Националната гарда на САД и резервните трупи, вели Дара Масикот, висок истражувач на политиката во корпорацијата РАНД.

- Во основа им се јавуваат од ладилникот - рече таа.

Предизвици за Русија

Мобилизацијата е исто така огромен ризик. Потребно е време: обука, опремување и организирање на работната сила.

Западните аналитичари се крајно скептични дека Русија има доволно тенкови, пешадиски борбени возила и оклопни транспортери за да им овозможи на новите трупи да бидат мобилни, реактивни единици способни за пробив и маневрирање.

Без тенкови и возила, новите единици би можеле да бидат чисто пешадиски единици, кои на хартија би можеле да ја чуваат внатрешноста на теренот, но реално би било тешко да се одбранат по лошата и недоволна обука, вооружени само со пешадиско оружје.

Москва се соочува со истите огромни логистички пречки во изминатите шест месеци војна. Нејзините сили претрпеа такви материјални загуби што руското Министерство за одбрана се обрати до Северна Кореја за муниција, според американски официјални лица. Последниот неуспех во североисточниот украински регион Харков остави некои од неговите руски тенковски единици сериозно исцрпени.

И Путин и Шојгу конкретно зборуваа за повикот на резервистите, но самиот декрет не се однесува само на оваа група. Тој дозволува „повикување на воена служба на граѓани на Руската Федерација преку мобилизација во вооружените сили на Руската Федерација“.

Но, потпирањето на Русија на чеченските единици, доброволните баталјони, милициите од Луганск и Доњецк, па дури и осудените регрутирани од платеници на Вагнер, го отфрлаат тврдењето дека има подготвено снабдување со ветерани за да одат во првите борбени линии.

Извор:блиц.рс