Во вооружен напад во средното училиште во градот Тамблер Риџ, во Британска Колумбија, во Канада, убиени се десет лица, вклучувајќи го и напаѓачот, објавија властите.

Би-Би-Си јави дека пукањето се случило околу 13:20 часот по локално време.

Полицијата пронашла шест мртви лица во училиштето, додека седмиот починал на пат кон болницата, а две лица биле пронајдени без знаци на живот во куќа во близина на училиштето.

Полицијата верува дека двата смртни случаи во куќата се поврзани со инцидентот во училиштето.

Напаѓачот, исто така, бил пронајден мртов, а полицијата верува дека смртоносните повреди самиот си ги нанел. Иако се уште не е потврдено, веќе се појавуваат информации дека напаѓачот е најверојатно жена.

Шефот на полицијата Кен Флојд изјави дека 25 лица се здобиле со полесни повреди, а две лица се здобиле со сериозни повреди.

Во безбедносното предупредување испратено за време на нападот, осомничениот е идентификуван како „женско лице во фустан, со кафена коса“.

Официјалните лица велат дека го знаат идентитетот на напаѓачот, но досега не го објавиле името или полот.

Полицијата сè уште не го идентификувала видот на оружјето што е употребено во нападот, ниту возраста на жртвите.

Премиерот на Британска Колумбија, Дејвид Аби, на прес-конференција изјави дека полицијата пристигнала на местото на нападот две минути по повикот, со што спречила оваа ужасна трагедија да стане уште полоша.

A tragic mass shooting occurred on February 10, 2026, at Tumbler Ridge Secondary School in the small town of Tumbler Ridge, northeastern British Columbia, Canada.

According to the latest updates from the Royal Canadian Mounted Police (RCMP) and multiple reliable news… pic.twitter.com/2QW3p4JWYa

— The Informant (@theinformant_x) February 11, 2026

Во училишниот комплекс се наоѓаат основно и средно училиште, од кои се евакуирани околу 1.000 ученици и наставници.

Градот Тамблер Риџ, со околу 2.400 жители, е оддалечен околу 1.200 км од Ванкувер и е близу до границата со Алберта. 

Канадскиот премиер: Шокиран сум од овој ужасен напад

„Ова е мала, тесно поврзана заедница со мал одред на Кралската канадска коњичка полиција (RCMP), која реагираше во рок од две минути, несомнено спасувајќи животи денес“, изјави Нина Кригер, министерка за јавна безбедност на Британска Колумбија, за новинарите. Пукањето е меѓу најсмртоносните во канадската историја.

Во април 2020 година, 51-годишен маж преправен како полицаец и возејќи лажен полициски автомобил уби 22 лица во 13-часовно дивеење во атлантската покраина Нова Шкотска пред да биде застрелан од полицијата на бензинска пумпа на околу 90 км од местото на неговите први убиства.