Рон Десантис, републиканскиот гувернер на Флорида, е главната закана за кандидатурата на Трамп за претседателските избори.

Демократите ќе ја задржат контролата врз американскиот Сенат откако сенаторката Кетрин Кортез Масто победи на реизборот во Невада. Со нејзината победа, демократите ќе контролираат најмалку 50 места во Сенатот, откако демократскиот сенатор Марк Кели го одбрани своето место во Аризона, а потпретседателката Камала Харис го има одлучувачкиот глас во случај на нерешени 50-50 меѓу демократите и републиканците. Задржувањето на контролата врз Сенатот значи дека демократите сепак ќе можат да ги одобруваат кандидатите на Бајден, како федералните судии.

Ако некое место остане испразнето во следните две години, тоа би значело и назначување во Врховниот суд, кој сега има конзервативно мнозинство. Ако демократскиот сенатор Рафаел Ворнок победи на вториот круг од Џорџија на 6 декември против републиканскиот противкандидат Хершел Вокер, тоа ќе го зголеми демократското мнозинство на 51-49.

Ова ќе им даде на демократите дополнителна предност во усвојувањето на оние закони кои можат да бидат усвоени со просто мнозинство, бидејќи за повеќето закони во Сенатот се потребни 60 гласа.

Победата на демократите во трката за сенатот ја разниша поддршката на републиканците за поранешниот претседател Доналд Трамп, кој пред изборите најави „голем црвен бран“. Многу републиканци сега го обвинуваат Трамп за лошите изборни резултати и повеќе би сакале да видат друг републиканец во трката против демократскиот кандидат на претседателските избори во 2024 година.

Еден од најпопуларните републиканци во моментов е Рон Десантис, кој победи на изборите за гувернер на Флорида со убедлива разлика од 1,5 милиони гласови.

Тој се смета за „голем победник“ на американските конгресни и гувернерни избори во САД и нашироко се смета за можен соперник на Доналд Трамп за претседателската номинација на републиканците во 2024 година.

Десантис е релативно новодојденец во политиката, но се здоби со национално значење откако стана гувернер на Флорида во 2019 година.

Само неколку часа пред среднорочните избори во вторник, Доналд Трамп го предупреди Десантис да не се кандидира за претседател во 2024 година, велејќи дека тоа ќе и наштети на Републиканската партија.

„Мислам дека би направил грешка. Мислам дека партијата не би го сакала тоа“, изјави поранешниот претседател за Фокс њуз.

Неговите силни ставови за контроверзните прашања како што се родот, учењето за расни прашања во училиштата и абортусот, се чини дека одекнале кај гласачите, бидејќи тој, наводно, ја зголемил својата гласачка база во речиси секоја демографска област.