Полските власти уапсија украински нуркач осомничен за учество во подводни експлозии што го оштетија гасоводот „Северен тек“ во Балтичкото Море помеѓу Русија и Германија пред три години, објавија полските и германските обвинители.

Володимир З. е приведен во Прушков, во централна Полска, изјави на прес-конференција Пјотр Антони Скиба, портпарол на Окружното обвинителство во Варшава, објави АП.

Осомничениот, чие целосно име не е објавено поради правилата за приватност, е приведен врз основа на европска потерница издадена од германските власти.

Полската полиција се обиде да го уапси минатата година, рече Скиба, но тој успеа да замине за Украина, според полската радио станица RMF FM.

46-годишникот бил жител на Полска, каде што живеел со своето семејство и поседувал бизнис во земјата, изјави портпаролот на Окружното обвинителство во Варшава.

Тој е осомничен за кривични дела поврзани со детонација на експлозиви, саботажа и уништување на згради, објави германското федерално обвинителство.

Се вели дека „обучениот нуркач“ бил дел од група што го однела на изнајмена едрилица со фалсификувани документи од германскиот крајбрежен град Росток до близина на островот Борнхолм, каде што нуркале за да постават експлозиви што биле детонирани на цевководите Норд стрим 1 и Норд стрим 2.

„Експлозиите сериозно ги оштетиле двата цевководи“, се вели во соопштението на обвинителот.

Портпаролот на Окружното обвинителство во Варшава изјави дека полските обвинители разгледуваат барање за негово привремено апсење од седум дена, во кое време ќе подготват барање за екстрадиција.

Тимотеус Папроцки, адвокатот на Володимир З., изјави дека одбраната ќе се бори против екстрадицијата.

Уште еден Украинец беше уапсен минатиот месец во Италија во врска со експлозиите на подморските цевководи изградени за транспорт на руски природен гас до Германија под Балтичкото Море, потсетува АП.