Состојбата на папата Франциско останува „критична“ откако претрпе „продолжена респираторна криза слична на астма“, соопшти Ватикан. Папата е „полошо од вчера“ и доби трансфузија на крв, се вели во соопштението.

Ватикан извести дека 88-годишниот папа бил свесен и седел во својата лежалка, но му бил потребен „висок проток“ на кислород, а неговата прогноза „останува неизвесна“.

Папата се лекува од пневмонија на двете белодробни крила во болницата Гемели во Рим.

Трансфузијата на крв била неопходна поради нискиот број на тромбоцити, поврзан со анемија, соопшти Ватикан. Состојбата на Светиот Отец останува критична“, се вели во соопштението. „Папата не е надвор од животна опасност. Светиот Отец останува присебен и го помина денот во лежалка, иако е полошо од вчера“, се додава.

Прв пат примен во болница во средината на месецот

Папата првпат беше примен во болница на 14 февруари, откако неколку дена имаше тешкотии со дишењето.

Претходно, Ватикан објави дека папата Франциско нема да се појави во јавноста да води молитва со верниците во недела, што значи дека ќе го пропушти настанот втора последователна недела.

Во петокот неговите лекари рекоа дека нема непосредна закана по неговиот живот, но дека тој „не е надвор од животна опасност“.

Неговата состојба претходно беше опишана како сложена. Папата е особено подложен на инфекции на белите дробови бидејќи како возрасен разви плеврит - воспаление околу белите дробови, а на 21-годишна возраст му бил отстранет дел од едното белодробно крило. За време на неговите 12 години како водач на Римокатоличката црква, Аргентинецот неколку пати беше хоспитализиран, вклучително и во март 2023 година, кога помина три ноќи во болница со бронхитис.