Одлуката со која Украина за своите реактори ќе користи нуклеарно гориво од САД, во електраните изградени за време на Советскиот Сојуз, би можело да ја загрози и безбедноста на европско ниво, соопштило руското Министерство за надворешни работи. Москва смета дека таа одлука би можела да ја загрози внатрешната безбедност и реагирала веднаш откако украинскиот премиер Арсениј Јацејњук во вторникот објави дека е потпишан договор со американската компанија „Вестингхаус“ за дистрибуција на нуклеарно гориво за украинските постројки, пренесува агенцијата „Тасс“. Руското министерство во соопштение предупредува дека одлуката претставува експеримент, како и дека нуклеарното гориво произведено во „Вестингхаус“ не е во потполност во склад со реакторите од советската ера во Украина. Москва потсетува и на нуклеарната катастрофа во Чернобил во 1986 година, додавајќи дека до неа дошло токму поради неусогласување на типот на реакторот и грешките што ги направило раководството на електраната.