Новиот германски министер за внатрешни работи, Хорст Зехофер, денеска изјави дека „исламот не е дел од Германија".

Германија е христијанска земја, вели Зехофер, наведувајќи дека доаѓаат слободни денови и црковни празници. 

Изјавата на Зехофер за "Bild" дека "исламот не е дел од Германија" е во спротивност со пораката на поранешниот германски претседател Кристијан Вулф, кој во 2010. година отворил дебата за имиграцијата, велејќи дека "исламот е дел од Германија".

Таа изјава на Вулф, за време на протестите на групата ПЕДИГА во 2015. година, ја повторила и германската канцеларка Ангела Меркел.

„Муслиманите кои живеат кај нас секако дека се дел од Германија. Но, тоа не значи дека поради тоа треба да се откажеме од нашите традиции и обичаи" - вели  Зехофер.

Лидерот на Христијанско-социјалната унија најавил одржување на конференција за исламот, за да се расправа за проблемите со интеграцијата на муслиманите.

Германската канцеларка Ангела Меркел го повтори ставот дека муслиманите и нивната религија се дел од Германија, реагирајќи на изјавата на новиот германски министер за внатрешни работи Хорст Зехофер кој го негираше местото на исламот во христијанска Германија.