Повеќе од 20 земји, вклучувајќи ги Велика Британија, Германија, Франција, Јапонија и Јужна Кореја, изјавија дека се подготвени да учествуваат во напорите за обезбедување безбеден премин низ Ормускиот теснец, остро осудувајќи ја блокадата на овој клучен морски пат од страна на Иран.

Вкупно 22 земји, претежно европски, но и Обединетите Арапски Емирати и Бахреин, во заедничка изјава изјавија дека се подготвени да придонесат за „соодветни напори“ за обезбедување слобода на пловидбата.

„Подготвени сме да придонесеме за соодветни напори за обезбедување безбеден премин низ теснецот. Ја поздравуваме посветеноста на земјите кои веќе работат на планирање на подготвеноста“, се вели во соопштението.

Во истиот документ, земјите остро ги осудија, како што наведоа, неодамнешните ирански напади врз невооружени трговски бродови во Заливот, нападите врз цивилната инфраструктура, вклучувајќи ги и нафтените и гасните постројки, како и де факто блокадата на Ормускиот теснец од страна на иранските сили.

Во исто време, американската војска тврди дека способноста на Иран да ја загрози пловидбата низ Ормускиот теснец е значително ослабена по нападот врз подземен објект каде што, според Вашингтон, биле складирани крстосувачки ракети и друго оружје.

Командантот на Централната команда на САД (CENTCOM), адмирал Бред Купер, во видео порака објавена на мрежата X изјави дека американските сили го погодиле не само тој објект, туку и дополнителни воени капацитети поврзани со надзор на поморскиот сообраќај.

„Ние не само што го уништивме тој објект, туку уништивме и места за поддршка на разузнавањето, како и ракетни радарски релеи што се користеа за следење на движењата на бродовите“, рече Купер.

Тој додаде дека ова ја „деградирало“ способноста на Иран да ја загрози слободата на пловидба во и околу Ормускиот теснец, велејќи дека САД ќе продолжат да ги таргетираат таквите цели.

Ормускиот теснец е еден од најважните светски патни правци за испорака на нафта и гас, а секое сериозно нарушување на пловидбата низ преминот веднаш врши притисок врз глобалните енергетски пазари.