Новиот унгарски премиер Петер Маѓар денеска повторно побара претседателот Тамаш Шујок и највисоките судски функционери поврзани со системот на екс премиерот Виктор Орбан да поднесат оставки до 31 мај, предупредувајќи дека новото парламентарно мнозинство ќе ги искористи законските можности за нивно отстранување ако не си заминат доброволно.

Лидерот на партијата Тиса, кој по изборната победа од 12 април се подготвува да ја преземе владата, ја претставува оваа фаза како почеток на институционално расчистување по 16 години владеење на Орбан. Според Reuters, Маѓар на прес-конференција порача дека рокот до 31 мај важи за, како што ги нарече, „куклите на Орбан“, а по тој датум неговата партија ќе постапува според мандатот што го добила од гласачите.

Унгарските медиуми пишуваат дека барањето не се однесува само на претседателот Шујок, туку и на поширок круг институционални позиции што Маѓар ги смета за столбови на досегашниот систем: претседателот на Куријата, претседателот на Уставниот суд, јавниот обвинител, Државниот завод за ревизија, органот за конкуренција, медиумскиот регулатор и Националната судска канцеларија.

Маѓар не најавува само смена на владата, туку и демонтажа на институционалната архитектура што Фидес ја градеше со години. Неговата порака е дека изборната победа нема да има смисла ако клучните контролни позиции останат во рацете на луѓе што, според него, ѝ служеле на претходната власт.

Претседателската палата досега реагираше воздржано.

foto printskrin youtube