Организаторот на нападите врз Израел и командантот на терористичката организација Хамас, Мохамед Деиф е недофатлив, не се појавува во јавноста, а во ретки случаи објавува видео пораки. Ова е човекот од сенките, познат по името „Гост“, што е директен превод на неговото презиме, но и „мачорот со девет животи“. Токму тој со години е цел број еден на Израел, имајќи предвид дека стои зад многу напади, пренесува Нова.рс.

Првиот прекар се однесува на неговата навика да престојува со различни луѓе секоја вечер за да избегне откривање, додека вториот алудира на неговата вештина да избегнува обиди за атентат од Израел.

Ретко појавување во јавноста

Неколку часа по ненадејниот напад на Хамас врз Израел, Деиф се појави во снимена видео порака, најавувајќи го почетокот на, како што ја нарече, операцијата „Бура Ал Акса“.

"Доста е доста. Решивме да ставиме крај на сето ова“, рече тој во видео пораката, повикувајќи ги Палестинците да се приклучат на борбата.

Тој рече дека упадот во Израел е одговор на 16-годишната блокада на Газа, рациите на градовите на Западниот Брег во текот на изминатата година, насилството во Ал Акса и се почестите напади врз Палестинците и севкупниот раст на населбите.

Недостижниот воен командант

Не се знае точната година кога Деиф му се приклучил на Хамас, постои сомневање дека најверојатно била во 1990 година. Според Sky News, тој потоа ја научил уметноста на правење бомби од познатиот производител познат како „инженерот“, Јехја Ајаш.

Деиф е обвинет за организирање серија самоубиствени бомбашки напади од 1995 година и се смета за одговорен за смртта на десетици Израелци.

Тој е заслужен и за создавање на мрежа од тунели под Појасот Газа и дизајнирање на ракетата Касам.

Тој стана шеф на бригадите Касам, воениот огранок на Хамас, во 2002 година, откако Израел го уби поранешниот лидер.

Поранешниот висок член на Хамас, Имад Фалоџи, во 2014 година за Вашингтон пост изјави дека Деиф е успешен во својата работа, бидејќи воопшто не се појавува во јавноста, речиси и да нема негови фотографии.

„Се крие меѓу населението и кога патува користи различни идентитети, а се уште е жив, бидејќи се движи во тесен круг на луѓе“, рече Фалоџи.

Дури и единствената позната фотографија од него е онаа направена за лична карта кога имал 30 години. Денес тој има околу 55 години. Агенцијата АП пишува дека дури и во Газа „само неколку луѓе би го препознале Деиф“.

Војна на Израел Палестина во Газа Фото: Танјуг/АП Фото/Хасан Еслајах

„Мачката со девет животи“

Деиф е најбараниот човек во Израел од 1995 година и преживеал повеќе обиди за атентат. Сепак, ниту еден од нив не остана неповреден. Тој наводно е делумно парализиран и користи инвалидска количка, а во еден од нападите изгубил око и рака.

Во израелски воздушен напад во 2014 година, Деиф остана без сопругата и двете деца - сите загинаа во бомбардирањето.

Илјадници луѓе присуствуваа на погребот на семејството Деиф. Ковчегот покриен со бела ткаенина во кој се наоѓало телото на момчето го носел еден од роднините. Ожалостените скандираа „одмазда“ за време на поворката.

Потоа Деиф објави аудио снимка во која се вели дека Хамас избрал да напаѓа војници, а не цивили. Видеото е објавено заедно со фотографии од борците на Хамас кои ја напаѓаат малата израелска воена база во близина на Газа.

Имаше гласини дека бил убиен во септември 2002 година. Претставници на израелското разузнавање потврдија дека Деиф го преживеал нападот.

Американскиот Стејт департмент го стави Деиф на листата на специјални глобални терористи (SDGT).

Претходниот живот

Деиф е роден како Мохамед Диаб Ибрахим ал Масри во бегалскиот камп Кан Јунис во 1960-тите. Малку се знае за неговото воспитување, освен што студирал природни науки на Исламскиот универзитет во Газа, каде што бил и дел од театарската група наречена Повратници.

Според Скај њуз, тој продолжил да глуми откако му се приклучил на Хамас, понекогаш играјќи улоги во пропагандни видеа, изјави експертот за Блискиот Исток од Институтот Ајзенхауер, Ави Меламед за Вашингтон пост.

Најкрвавиот ден од почетокот на конфликтот меѓу Израел и Хамас: Нетанјаху објави вознемирувачки фотографии од масакрот, 6.000 ракети се фрлени врз Газа од саботата

Неговиот глас последен пат се слушна во 2021 година, кога предупреди дека Израел ќе плати „тешка цена ако ги истера Палестинците од нивните домови во Источен Ерусалим“.

Во 11-те дена од конфликтот што следеше, најмалку 250 луѓе беа убиени во Газа и 13 во Израел.

Пред тоа седум години немаше слушнато.