Новиот градоначалник на Лондон, Садик Кан најави дека ќе организира ифтари низ градот во синагоги, цркви и џамии. 

Тој е првиот муслиман  градоначалник на Лондон,  и во колумна за британскиот весник „Гардијан“ пишува за претстојниот месец Рамазан. „Не се сметам за муслимански политичар, не сум портпарол на муслиманите, ниту нивен лидер и тоа е важно да се нагласи бидејќи во тој случај сте дефинирани со верата. Сите имаме различни идентитети: јас сум жител на Лондон, син и татко“- напиша Кан. Кан вели дека е свесен дека исламот и муслиманите во денешно време се поврзуваат со негативни работи. „Мој приоритет во месецот Рамазан ќе биде да излезам и да изградам мостови, така што ќе организирам ифтари низ градот во синагоги, цркви и џамии. Постот е добра прилика за тоа, бидејќи кога ќе поделите леб со некого и ќе поканите немуслиман на ифтар, да вечера со вас, тоа покажува дека тука нема ништо лошо ниту чудно“- додава Кан. Кан смета дека во град како Лондон, повеќето луѓе знаат за Рамазан и постот.