Рускиот министер за надворешни работи, Сергеј Лавров, изнесе серија обвинувања на сметка на САД, тврдејќи дека Вашингтон ги користи санкциите, енергетската политика и геополитичкиот притисок за да го прошири глобалното влијание и да ги ослаби руските и другите меѓународни позиции.

Лавров, во интервју за „RT India“, наведе дека САД се обидуваат да ги отстранат руските нафтени компании „Лукоил“ и „Роснефт“ од меѓународните зделки.

„Ги споменавте групите 'Лукоил' и 'Роснефт', а целта не е скриена – таа е овие компании да се истиснат од сите меѓународни работи“, оцени Лавров.

Тој тврди дека целта на санкциите е овие компании да се потиснат од глобалните пазари, вклучувајќи ги Африка и Балканот, потсетувајќи дека САД кон крајот на октомври минатата година воведоа рестриктивни мерки против овие енергетски фирми и нивните претставништва.

Лавров оцени дека Вашингтон ја продолжува политиката на економски притисок и под актуелната администрација на американскиот претседател Доналд Трамп, наведувајќи дека не само што се одржуваат санкциите од времето на поранешниот претседател Џо Бајден, туку се воведуваат и нови мерки. Според неговите зборови, САД се обидуваат „економски да ја казнат“ Русија преку дополнителни иницијативи, иако за потенцијалната соработка јавно се зборува на поинаков начин.

Рускиот шеф на дипломатијата ги обвини САД дека сакаат да ги контролираат глобалните енергетски текови, вклучувајќи го и влијанието врз гасоводот „Северен тек“, преземањето на транзитот на гас низ Украина и влијанието врз нафтените проекти во Венецуела и нивната соработка со Русија.

„Тие сакаат, за тоа и отворено зборуваа, да ѝ го одземат на Украина транзитниот гасовод од Русија за Европа, за да можат да ги контролираат и тие текови“, рече тој.

Лавров тврди дека Вашингтон сака да ги купи или контролира европските инфраструктурни проекти за да ги диктира цените и тековите на гасот во Европа.

„Ако го направат тоа, ќе ги натераат Германците да го повратат своето национално достоинство и да кажат: 'Во ред, ќе го користиме овој гасовод.' Но, цените веќе нема да бидат резултат на договор меѓу добавувачот, Русија и Германија; ќе ги диктираат Американците, кои ќе го купат овој гасовод од Европците“, изјави тој.

Говорејќи за Венецуела, Лавров рече дека САД се обидуваат да ја преземат претходната енергетска соработка на таа земја со руската компанија „Роснефт“, со оценка дека таквите односи нема да бидат рамноправни.

Лавров заклучи дека САД настојуваат да ги принудат државите да купуваат американски, а не руски енергенси, што го опиша како облик на „неоколонијална политика“ и обид за доминација преку контрола на глобалниот енергетски пазар.

„Суштината е сите да се примораат да купуваат не евтина нафта од Русија, туку скапа нафта и течен природен гас од Соединетите Американски Држави. На тој начин, тие настојуваат да владеат со светот преку контрола на глобалната енергија“, нагласи Лавров.

Тој исто така истакна дека заедничките руско-американски проекти во различни области не се реализираат, и покрај разговорите за потенцијалот на таквите иницијативи откако Трамп дојде на власт. Тој напомена дека под Трамп, Русија и САД одржуваат контакти на различни нивоа, но резултатите изостануваат.

„Многу убаво се зборува за тоа како Русија и САД имаат огромен потенцијал за заемно корисни, модерни, технолошки, енергетски и други проекти. Но, во реалноста ништо не се случува“, заклучи тој.