Латвија забрани увоз на книги, видео игри и облека од Русија и Белорусија. 

Парламентот на Латвија усвои законски измени со кои се забранува увоз на низа производи за широка потрошувачка од Русија и Белорусија кои досега не биле предмет на санкции од ЕУ. Мерката има за цел дополнително да ги прекине економските врски со Москва и да се бори против пропагандата на Кремљ, објави „Еуроњуз“.

Амандманите на латвискиот Закон за поддршка на цивилното население на Украина наведуваат дека „увозот на одредени индустриски производи во Република Латвија од Руската Федерација и Република Белорусија е забранет“ со цел „да се обезбеди безбедноста на латвиското општество и да се обезбеди општа поддршка на украинското општество“.

Новиот закон забранува увоз на производи од руско и белоруско потекло кои претходно не биле предмет на царини, санкции или други трговски ограничувања на ЕУ. Така, се чини дека Латвија стана една од првите членки на ЕУ што воведе национална забрана за толку широк спектар на стоки надвор од заедничкиот режим на санкции. Ограничувањата важат и за производи увезени преку трети земји.

Забраната беше изгласана истиот ден кога ЕУ се согласи за нов пакет санкции, а таа опфаќа производи за кои пратениците веруваат дека можат да се користат за ширење пропаганда. Листата вклучува книги, весници и видео игри, како и спортска опрема, играчки, облека и обувки.

Нацрт-законот го подготви латвиското Министерство за надворешни работи, а парламентот го усвои по итна постапка. Тоа е дел од поширокиот напор на владата целосно да ги прекине преостанатите трговски врски со Русија.

Вредноста на увозот на опфатени стоки од Русија и Белорусија во 2025 година изнесуваше 12,5 милиони евра. 

Инаку, Латвискиот почесен конзулат во украинскиот град Славјанск беше оштетен во руски напад во кој загинаа шест цивили, а десетици беа повредени, соопштија украински и латвиски претставници, додека Европската унија и балтичките земји го осудија нападот.

foto freepik.com