Една од најголемите банки во Велика Британија, Кралската банка на Шкотска (ПБС), ќе плати казна во износ од 612 милиони долари поради местење на основната каматна стапка, ЛИБОР, како и поради финансиски измами во Јапонија. Како што пренесуваат шкотските медиуми, првите луѓе на Кралската банка на Шкотска признаваат дека постоеле сериозни недостатоци во внатрешната контрола, како и дека со причина е доведен под знак прашање интегритетот на помал број вработени во банката. „Ова е тажен, но и значаен ден за нашата банка, бидејќи продолжуваме да ги исправуваме грешките од минатото“, изјави претседателот на управниот одбор на банката Филип Хемптон. Истрагата покажа дека од 2006 до 2010 година, а можеби и порано, над десет вработени во филијали на Кралската банка на Шкотска во Лондон, Сингапур и Токио манипулирале со каматата за меѓубанкарски понуди на лондонската берза ЛИБОР, која влијае на цената на илјадници милијарди долари кредити низ целиот свет