Германскиот канцелар Олаф Шолц во интервју организирано од весникот Heilbronner Stimme изјави дека е подготвен да разговара со рускиот претседател Владимир Путин.

- Во сегашната ситуација треба да разговараме со него повторно и повторно, што направив минатата година и што ќе правам во иднина - рече тој.

Истовремено, канцеларот додаде дека е неопходен „одлучен чекор“ на Москва за почеток на руско-украинските преговори. Според него, станува збор за повлекување на војниците. Шолц додаде дека Русија сега „очигледно не е подготвена“ за тоа.

Портпаролот на Кремљ, Дмитриј Песков, пред руските новинари ги коментираше зборовите на германскиот канцелар Олаф Шолц за неговата подготвеност за дијалог со Путин.

- Претседателот никогаш не исклучува контакти, претседателот секогаш вели дека е отворен за различни контакти, особено на највисоко ниво. Но, претседателот секогаш бил и останува поддржувач на ефективни контакти, не само заради самиот процес, туку заради резултатите – рече Песков.

Слушајќи го канцеларот, според портпаролот, се уште не се забележува дека се земаат предвид интересите на Руската Федерација.

– Сепак, позициите на голем број лидери на ЕУ може да се променат со текот на времето – додаде портпаролот на Кремљ.

Тој исто така посочи дека турскиот претседател Реџеп Таип Ердоган сака да разговара со рускиот претседател за ситуацијата во Појасот Газа.

– Во наредните часови ќе биде договорен разговор на високо ниво со турската страна – изјави Дмитриј Песков.