Конго досега потврди 2.011 случаи на ебола. Според бројките објавени преку ноќ од Министерството за здравство на Конго, досега починале 754 лица.

Тамошните власти ја опишуваат како најбрзо растечка епидемија досега.

Вкупно 753 лица остануваат во изолација или на болничко лекување, додека 366 се опоравиле.

Следењето на контактите останува голем предизвик, при што само 67 проценти од оние кои биле изложени на вирусот досега се опфатени.

Светската здравствена организација (СЗО) денес соопшти дека во Демократска Република Конго започна првото клиничко испитување на антивирусен лек дизајниран да спречи инфекција со сојот на ебола Бундибугио кај луѓе кои биле во контакт со заразени лица.

Испитувањето, наречено EBO-PEP, ја оценува ефикасноста на експерименталниот лек обелдесивир, кој се зема орално и е наменет за луѓе кои биле изложени на вирусот, но сè уште немаат симптоми на болеста.

Генералниот директор на СЗО, Тедрос Аданом Гебрејесус, изјави дека успешниот исход од испитувањето би можел да претставува голем чекор напред во спречувањето на развојот на болеста кај луѓе со висок ризик од инфекција.

Во моментов нема одобрени вакцини или третмани за сојот на ебола Бундибугио.

Според најновите официјални податоци од властите на Демократска Република Конго, овој редок сој на ебола инфицирал повеќе од 1.960 луѓе, додека повеќе од 700 починале, пренесува АФП.

Епидемијата е прогласена на 15 мај во североисточната покраина Итури, а случаите оттогаш се потврдени во пет покраини на Демократска Република Конго и соседна Уганда, иако повеќе од 90 проценти од случаите сè уште се регистрирани во Итури.

Во студијата ќе бидат вклучени речиси 1.000 лица над 12 години кои биле во директен контакт со потврден случај на инфекција во претходните пет дена. Учесниците ќе бидат под дневен медицински надзор 21 ден, со конечна проверка по 42 дена.

Вистинскиот обем на епидемијата би можел да биде два до четири пати поголем од официјално регистрираниот, бидејќи повеќето нови случаи не се поврзани со претходно познати синџири на пренос на инфекцијата, се вели во соопштението на СЗО.