Според податоци на World's Top Export глобалниот извоз на автомобили во 2015 година изнесувал 672,9 милијарди долари.

Автомобилите се втор најизвезуван производ во светот, а пред нив е само суровата нафта.

Европските земји сочинуваат над половина од сите продажби  на автомобили. Испораките изнесуваат 363,9 милијарди долари, или 54,1% од сите меѓународни продажби на возила.

Вредноста на вкупниот меѓународен извоз на автомобили за 2015 година забележува зголемување од 5,5% во однос на 2011 година, но сепак е за 5,2% помалку во однос на 2014 година.

Во Европа се наоѓа и земјата каде извозот лани достигна највисоки резултати - Германија со 152,7 милијарди долари, или 22,7% од глобалниот извоз.

На второ место на листата е Јапонија со 86,1 милијарди долари, или 12,8% од меѓународна продажба, а на третото место се САД со 55,3 милијарди долари, или 8,2%.

Во првите десет има уште четири европски земји  и тоа Велика Британија, Шпанија, Белгија и Франција. Топ 10 листата се дополнува со Канада, Јужна Кореја и Мексико. Првите петнаесет држави формираат 88,7% од глобалниот извоз на автомобили во 2015 година.