Паѓање на системот за воздушна контрола во главниот диспечерски центар на британската цивилна авијација во Суонуик предизвика хаос на британските аеродроми , како и во Ирска . Десетици летови имаат одложувања , многу други се откажани , пренесоа светските агенции, повикувајќи се на аеродромските и британските власти. Лондонските аеродроми Хитроу , Станстед и Лутон , како и оние во Даблин , Глазгов , Единбург и Кардиф , најавија големи доцнења, посочува Франс прес. Домашни и меѓународни летови беа откажани на Хитроу - аеродромот со најголем патнички поток во Европа и со најголем меѓународен патнички сообраќај во светот. " Настана проблем при поставувањето на системот од ноќен кон дневен режим. Инженерите ни работат за негово решавање што е можно побрзо " , објаснија од британската служба за управување со воздушниот сообраќај . Технички проблеми со воздушната контрола во јужна Англија доведоа до одложувања на некои летови од Велика Британија и континентот утринава , рекоа и од аеродромот во Даблин . Портпаролот на аеродромот Станстед соопшти дека сите заминување и летови имаат помеѓу половина и два часа задоцнување .