Претседателот на Европската комисија Жан Клод Јункер изјавил дека верува оти ќе бидат потребни повеќе од две години за да се постигнат сите договори околу излезот на Британија од ЕУ.

„Мислам дека нема да успееме во рок од 24 месеци да ги постигнеме сите договори како Британија би ја напуштила ЕУ и воспоставила целосен однос со европскиот континент“, рекол Јункер на маргините на меѓународната конференција за безбедност во Минхен.

Британската премиерка Тереза Меј рекла дека ќе се активира член 50 од Лисабонскиот договор во март како би се покренале преговорите за Брегзит кои би можеле да траат до две години.

Јункер додал дека најмалку 20 000 закони би морале да бидат променети во Британија пред да може да ја напушти ЕУ, како и дека Британија нема право да ги доврши спогодбите за билатерална трговија додека е уште во Унијата.