Гувернерот на Флорида, Рон ДеСантис дозволува повторно отворање на некои плажи во северна Флорида, објави во петокот Асошиејтед Прес, иако државата продолжи да забележува зголемување на случаи на коронавирус.

Од петокот, Флорида објавила над 24.000 случаи на вирус и скоро 700 смртни случаи.

ДеСантис, кој првично им остави на локалните власти да ги затворат своите плажи и другите установи, на прес-конференцијата во петокот рече дека некои окрузи би можеле да започнат со повторно отворање на нивните плажи ако сакаат, додавајќи дека е важно луѓето да добијат свеж воздух.

„Направете го тоа на добар начин“, рече ДеСантис. „Направете го тоа на безбеден начин“.

Градоначалникот на Џексонвил, Лени Кари изјави дека плажите во округот Дувал ќе се отворат од 6 до 11 часот претпладне и од 5 до 8 часот попладне. Во меѓувреме, округот Сент Џонс, каде живее ДеСантис, рече дека ќе ги отвори своите плажи од 6 наутро до пладне секој ден.

„Луѓе, ова би можело да биде почеток на патот назад кон нормалниот живот, но ве молиме, почитувајте ги и следете ги овие ограничувања“, рече Кари во видеото на социјалните медиуми. „Ќе се вратиме на животот каков што го знаеме, но мора да бидеме трпеливи“.

Собирите на 50 или повеќе луѓе сè уште се забранети, а луѓето се охрабруваат да бидат на социјална оддалеченост на плажа, додека вежбаат или прават други активности, како што е сурфање.